අසහාරා +  ASAHARA

හිටපු යුධ හමුදා විශේෂ බලකා නිලධාරී, විශේෂ බුද්ධි අංශ ඒජන්ත ලුතිනන් කර්නල් රංග ජයවර්ධන, තමා යෙදී සිටින මෙහෙයුම අතරමඟ නතර කර ආපසු කැඳවන ත්‍රස්තවාදී කටයුතු පිළිබඳ විමර්ශන බියුරෝවේ අධ්‍යක්‍ෂවරයා, ඔහුට නව මෙහෙයුමක් බාරදීමට කටයුතු කිරීමත් සමඟින් ඔහු මවිතයට පත්වන්නේ, පාලු වනාන්තරයක් තුළ තිබී අහඹු ලෙස හමුවන වෙඩි වැදීමෙන් මරණයට පත් විදේශිකයෙකුගේ බවට සැකකරන මළසිරුරක් පිළිබඳ පරීක්ෂණයක් රාජ්‍ය බුද්ධි අංශය වෙත පැවරීම තරමක් අසාමාන්‍ය සිදුවීමක් නිසාවෙනි. එහෙත් රටේ මර්මස්ථාන රැසක සිතියම් අතැතිව මියගොස් සිටින එම විදේශිකයා, රටට ඇතුළු වී ඇත්තේ ව්‍යාජ හේතු දක්වමින් බව හෙළිවීමත් සමඟ ඔහු කිසියම් හෝ ත්‍රස්ත ක්‍රියාවකට සැරසුණු අයෙක්ද යන සැකය ඔහුගේ මරණය පසුපස හඹා යන රංග ප්‍රමුඛ බුද්ධි අංශ නිලධාරීන් කණ්ඩායම තුළ ඇතිවේ. තමා සතුව ඇති සීමිත තොරතුරු පසුපස හඹා යන ශූර බුද්ධි අංශ නිලධාරීන් කණ්ඩායම, තුච්ඡ පාවාදීම් සහ දැඩි අභියෝගයන් හමුවේ අවසානයේ හෙළිකර ගන්නේ අති බිහිසුණු රහසකි.

බිහිසුණු ත්‍රස්තයන්ගේ කුරිරු අරමුණු ව්‍යර්ථ කිරීමට බුද්ධි අංශ නිලධාරීන් පිරිස සමත් වේද?

නැතහොත්, අධර්මය නැවත වතාවක් ජය ගනීද?

ෆියුරර් – Fuhrer

කටුනායක ගුවන්තොටුපොළ පරිශ්‍රයේ දී ජර්මානු තරුණියක් පැහැරගෙන යෑමේ සිදුවීමක් පිළිබඳ පරීක්ෂණ පවත්වන ආරක්ෂක අංශ එයට සැකපිට ශ්‍රී ලංකා බුද්ධි අංශයට අනුබද්ධ ත්‍රස්තවාදී කටයුතු පිළිබඳ විමර්ශන ඒකකයේ අධ්‍යක්ෂවරයා වන කර්නල් රංග ජයවර්ධන අත්අඩංගුවට ගනු ලබයි. කර්නල්වරයාගෙන් ප්‍රශ්න කිරීම සඳහා ඔහුව රහසිගත ස්ථානයක රඳවා තබන්නේ ඔහුට එරෙහිව ඇති සාක්ෂි ඉතා ප්‍රබල වූ බැවිනි.

ජර්මානු බුද්ධි අංශ නිලධාරිනියක් බව පසුව අනාවරණය වන එම තරුණියගේ අතුරුදන් වීමත් සමඟින් ඇරඹෙන පැටළිලි සහගත සිදුවීම් දාමය පරීක්ෂණ නිලධාරීන් කිසිසේත්ම අපේක්ෂා නොකළ ඉසව්වකට ඇදී යයි. තත්වය වඩාත් සංකීර්ණ අවස්ථාවකට පත්වන්නේ කර්නල්වරයා අධිකරණයට ඉදිරිපත් කිරීම සඳහා රැගෙන එන අතරතුර නාඳුනන පිරිසක් විසින් පැහැර ගැනීමත් සමඟිනි.

සිය තරුණ දිවිය දේශයේ ස්වෛරීභාවය වෙනුවෙන් කැපකරමින් සතුරන් හා යුධ වැදෙමින් තනිකඩ දිවියක් ගත කළ කර්නල් රංගගේ සිත සොරා ගැනීමට සමත් වූ ලතින් අමෙරිකානු රූමතිය කවරෙක්ද?

අලුත් අවුරුදු උදාවේ චන්ද්‍රිකා වැව් ඉස්මත්තේදී විදේශිකයන් පිරිසක් විසින් ඝාතනය කරන ලද නාඳුනන තරුණිය ඇයමද?

කර්නල් රංග අතුරුදන් වීමෙන් පසුව TAIB ඒජන්ත මොහොමඩ් රිස්වාන්ව හමුවීමට පැමිණි හිජාබයක් පැළඳ සිටි තුර්කි ජාතික රූමතිය කවරෙක්ද? කර්නල්වරයා පැහැරගැනීම සහ ඇය අතර ඇති සම්බන්ධතාවය කුමක්ද?

ජර්මානු තරුණිය අතුරුදන්වීමේ සිදුවීම පසුපස හඹා යන බුද්ධි අංශ නිලධාරීන් කණ්ඩායම මෙවරද හෙළිදරව් කරගන්නේ අති බිහිසුණු රහසකි.

ලෝක ඉතිහාසයට කිසිදා නොමැකෙන අඳුරු පැල්ලමක් එකතු කළ වියරු ඒකාධිපතියෙකුගේ මූලයන් හා බැඳුණු බිහිසුණු කුමන්ත්‍රණයක් පැරදවීමට තම ජීවිතය පරදුවට තබමින් ලොව වටා සැරිසරන බුද්ධි නිලධාරීන්ගේ වෑයම සාර්ථක වේද?

මානව ආචාරධර්ම සියල්ල පසෙකලා තම බිහිසුණු පර්යේෂණ සඳහා අසරණ මිනිසුන් යොදාගත් මරණයේ දේවදූතයාගේ මිලේච්ජ පර්යේෂණය සාර්ථක වේද?