මායා බන්ධන කතා මාලාව – SPELLBINDER SERIES

රියානාගේ ලෝකය – Riana’s World

සිඩ්නි උසස් පාසැලේ අධ්‍යාපනය ලබන පෝල් රෙනෝල්ඩ්ස් අදිසි සිදුවීමක ප්‍රතිඵලයක් ලෙසින් විවර වූ මායා දොරටුවකින් සමාන්තර ලෝකයක් කරා පිවිසීමෙන් කථා මාලාව ආරම්භ වෙයි. අදිසි දොරටුවෙන් ඇතුළු වූ පෝල් පිවිසෙන්නේ කාර්මික විප්ලවය ඇස නොගැටුණු ඉතා ප්‍රාථමික මට්ටමේ දිවි පෙවතක් ගෙවන වැසියන් පිරිසක් ජීවත්වෙන සමාන්තර ලෝකයකටයි. මේ ලෝකයේ වෙසෙන සුළු පිරිසක් අත පමණක් යම්කිසි මට්ටමක දියුණු තාක්ෂණික භාවිතාවක් තිබේ. ඒ සුළු පිරිස ‘මායා බන්ධකයින්’ ලෙසින් හඳුන්වනු ලබයි. මායා බන්ධකයින් තමන් සතුව ඇති තාක්ෂණ උපයෝගි කරගෙන බහුතර වැසියන් පාලනය කරනු ලබයි. සාමාන්‍ය වැසියන් ට නව දැනුම ගවේශනය කිරීම හෝ අත්හදා බැලීම සපුරා තහනම් ය. ඒ තහනමට එරෙහිව කටයුතු කරන පුද්ගලයින්ට දැඩි දඬුවම් හිමිවෙන අතර ඔවුන් දුෂ්කර මුඩුබිම් කරා පිටුවහල් කිරීමද මායා බන්ධකයින් විසින් සිදුකරනු ලබති.

සමාන්තර ලෝක සැරිසර – Lost Between World

කාලතරණ බොට්ටුව මත සිටගත් කැතී මෝගන් නුහුරු නුපුරුදු පරිසරය දෙස විමසිලිමත් ව බලා සිටියාය. බොට්ටුව නතර වි තිබෙන්නේ පයින් ගස් වලින් පිරි ගිය වනාන්තරයක් මැදය. කටුක ගන්ධයකින් පිරි සුළං දහරාවක් හමා යයි. මේ ආකාරයේ දුහුවිලි සුවද හා යුකැලිප්ටස් ගස් වල සුවද මුසු වු වාතාශයක් ඔස්ට්‍රේලියාවේ වනාන්තර වල නොදැනෙයි. මෙහි කුරුල්ලන් හඩ නගන්නේද වෙනස්ම රිද්මයකිනි. තමන් සිටින්නේ ඔස්ට්‍රේලියාවේ නොවන බව කැති ට වැටහිණි.

නිසැක වශයෙන්ම වෙනත් සමාන්තර ලෝකයකි.