එළියෙ වාහනයක් නතර වුණා. අපි මූණෙන් මූණ බලාගත්තා. අපි තුන්දෙනාගෙම ඇස් බයෙන් පිරිලා. ඩැනී නැගිටලා ජනේලය ළඟට දුවගෙන ගිහින්, තිර රෙද්ද අස්සෙන් එබිකම් කළා.
“පොලිසියෙන් ද?” මම කෙඳිරුවා.
“වෝල්ටර්. ඔයා තේ හදනවා වගේ රඟපාන්න. එයාට ඔයාගේ මූණේ ඔය පැත්ත පේන්න දෙන්න එපා. සෝෆාවෙ අඳුරුම කෙළවරේ වාඩි වෙලා අහක බලාගෙන ඉන්න….හායි, වෝල්ටර්.”
“ඔයාලා හොඳින්ද? වෙඩි සද්දයක් ඇහුණා.”
“ඔව්, ආයෙත් කබඩ්වල මීයො. මේ පාර නම් ඌව අහුවුණා.”
“ඔය ගෑණු ළමයි තුවක්කුව එක්ක පරිස්සමෙන් වැඩ කරන්න ඕන.”
“අපි පරිස්සම් වෙනවා. තාත්තා අපට උගන්නලා තියෙන්නේ.”
“ටිකකට කලින් එයාගේ ට්‍රක් එකේ සද්දේ ඇහුණා වගේ කියලා මට හිතුණා.”
“ඒ කෝට්නිව ඇරලවන්න ආපු එකක්.”
“ඔයාලගේ තාත්තා කවදාද ගෙදර එන්නේ? එයා කුලිය ගෙවන්න පරක්කුයි.”
“ඉක්මනටම එයි. අපට ඒ වෙනුවෙන් අමතර දෙයක් කරන්න පුළුවන් ද?”
“දන්නේ නෑ ඩැනී.  ඔයා දන්නවා නෙ ඔයාලට දෙන්න පුළුවන් තරම් වැඩ අපි දීලා තියෙන්නේ…. මොකක්ද ඒ සුවඳ?”
ෂිට්, එයාට ලේ සුවඳ දැනෙනවා ද?

නාඳුනන අය – Nadunana Aya – The Hichhikers

ඒ 1976 වසරේ ගිම්හානයයි.

ඇමෙරිකානු ජාතික ඇලිස් සහ ටොම්, තමන් මුහුණ දුන් ඛේදවාචකයකින් පසු බිඳුණු හදවත් සුවපත් කර ගැනීමේ අපේක්ෂාවෙන් ඔවුන්ගේ අලුත්ම RV රථයෙන් කැනඩාවේ විනෝද චාරිකාවක නිරත වෙති.

ඔවුන් දෙදෙනා තම ගමන පරිපූර්ණ ලෙස සැලසුම් කළහ. කඳවුරු බැඳීමට සුදුසු සෑම තැනක්ම කල් තබා සූදානම් කර ගත්හ.

චාරිකාව අතරමඟදී හමුවන නාඳුනන යුවලකට ඔවුන් ගමන් පහසුව සලසන්නේ කාරුණික වීමේ අදහසනි.

එහෙත් ඔවුන් විශ්වාස කළ පරිදි එම නාඳුනන යුවල අහිංසක සංචාරකයින් දෙදෙනෙක් නොවේ. ඔවුන් තමා පසුපස හඹා එන රුධිර ගංගාවක්, විනාශයක් වෙතින් පලායන උමතු යුවලකි.

එතැන් පටන් ඇලිස්ට සහ ටොම්ට සිදුවන්නේ මාරාන්තික ක්‍රීඩාවක සිරකරුවන් වීමටය. ආපසු හැරෙන්නට ඉඩක් නොමැත. දැන් ඔවුනට ඉතිරිව ඇත්තේ තම ජීවිතය බේරාගැනීමට මඟක් සොයා ගැනීමය.

සැබෑම නපුර ඇත්තේ කාගේ හදවතේද?
තරුණ යුවල සඟවන රහස කුමක්ද? හෙට දිනයේ ජීවත් වීමට වාසනාව ඇත්තේ කාටද?